Moritani: Jannginooɓe pellitii ɓamtude seppooji

Senndikaaji jannginooɓe kesɗitinii pellitte mumen, dartinde jannginde ngam yuɓɓinde seppooji. Senndikaaji jaŋde lesre e hakkundeere fof, ndenti mbaɗi bayyinaango wooto hollirde caɗeele muusɗe ɗe jannginooɓe nguuri nder weetaango leydi ndii.

Ɗiin Senndikaaji joɗɗinii aljumaa hanki ɗaɓɓaande maɓɓe, to jaagordu jaŋde ngenndiire ngam tintinde seppooji ɗi ɓe nganniyii yuɓɓinde. Ɗuum jogori wonde ko e nder lewru jolal so tawii caɗeele maɓɓe ñawndaaka, ko 38 senndikaa. Caggal nde mbaɗi diiño ñande 28 yarkomaa , yeeso jaagordu jaŋde, to Drenaaji e nder leydi ndii fof….Eɓe nganniyii kadi yuɓɓinde diiño woɗngo ñande 6 jolal 2024 yeeso galle laamorgo….Caggal ɗum maa ɓe ndartin jannginde nder wertaango leydi ndii fof fotde balɗe 3- tuggi 25, 26 haa 27 jolal 2024.

Gaa gaa caɗeele e ngonka caɗtuka ɗe jannginooɓe ngoytotoo, janngirɗe leydi ndii ine ŋakki jannginooɓe e ɗii duuɓi cakkitiiɗi. Caggal nde teskaa uujo doolnungo jannginooɓe Moritani faade Amerik e to Orop. Ɗuum baɗtinii e jaŋde ndee, sabu won heen kolliti ko noɓdi ndii ko seeɗa.

Laamu nguu kadi teeŋtinii jannginooɓe heewɓe ngoppii jannginde, njaltii leydi ndii, njahii to Orop won heen ko to Amerik, ngam ɗaɓɓoyde golle. Ɗum saabii oo sahaa laamu nguu ƴetti pellital artirde yahnooɓe fooftere duumiinde.

JP