Kaawisaaji ganndal : Ɗee limoreeje cuttame !

Kaawisaaji hiisaaji walla kaawisaaji limooje (Jeddittooɗe walla Paradoxes e Farayse) ɗi Muhammadu Faliilu Sih, bittoowo ko faati e hiisiwal toowngal, hollitta on e ndee winndannde. Ina jeyaa e ɗeen jeddittoonde, yeddittoonde anndiraande yeddittoonde Siimson. Min ɗaccida on kisa e Muhammadu Faliilu Sih :

Caggal nde liggodii-mi e kon muumon gila e duuɓi, mi heɓii anndude wonde ko limoreeje ngoni ɗemngal doolnungal e mum jangteteeɗi yoga e fiyakuuji tago koo fof, weeyo majje wonaa ɗeppo wertiingo ɗo geɗe ndegata; e ngo ŋarɗi so heewde tule, baamle e jolle, nehaaɗe e pome, pale e ŋore; ndeke njooɗndam majje soomodii ko e ñaaɗre, no njooɗndameeje dime keewi waade. Aduna majje ko e ceeɓɗi e dunaaji, so wonaa rewriwal tewingal kaaɗtudi waawaa heen sorde. Yoga e baayanɗe e sikkeeji mbattinta ko e haggude e ɗee pome, jookaade e ɗii beri haa nde ɓooy firti ɗumen. Hannde, miɗo yiɗi yeewtude huunde e ɗam ceeɓndam aduna limoreeje ɗam njoofii-mi dow ɗam.

   Ene gasa ɗum nafta e won e ngonkaaji. Mbele ɗum, mbaɗen ɗoo jarriborɗe:

– Jarriborde adannde : inniren nde A; ƴetten booñuuji ɗiɗi, mbiyen ɗi A1 e A2.

A1 loowi ko morle 5 ɓaleeje e morle 6 daneeje.  A2 loowi ko morle 3 ɓaleeje e morle 4 daneeje. Njiɗ-ɗen ko suɓaade gooto e ɗii booñuuji, toɓɓo-ɗen morlere wootere tawa ko toɓɓe gonnduɗe e hasre (woni ɗum ko en naatnat juŋngo tawa en ƴeewaani, njaltinen morlere).

Jooni so en njiɗii morlere toɓɓoto-ɗen ndee wona ɓaleere, hol heen booñ potaten suɓaade haa ɓuren heɓde oon fartaŋŋe ? Maa mbiyan tan « hol heen booñ ɓurata aaɓande yaltinnde ɓaleere? »  Anndude ɗum ne weeɓi, en kiisoto jeri. Kiisoɗen hol jerol morle ɓaleeje nder kala e ɗii booñuuji: Nder booñ A1, ene jogaa 5/11 (joyi dow sappo e go’o; morle ɗee e kuuɓal ko 11, heen 5 ko ɓaleeje), oon saanga heɓee ko ina tolnoo e 45,5% (capanɗe nayi e joy piccuɗe 5 nder teemedere), ko ɗum woni geɗal (jerol) morle ɓaleeje. Hono noon ne, nder booñ A2, jerol morle ɓaleeje ko 3/7, ko ina tolnoo e 42,9%. Waɗde ko aldaa e jas-jastinere, ƴettaten ko booñ A1, ngati ko toon jerol ɓaleeje ɓuri mawnude, wiyee ko kanko ɓuri aaɓannde yaltinnde ɓaleere so toɓɓe mbaɗaama.