Moritani: Ko famɗi fof yimɓe njoyo mbaasii pittaali mumen e pelɓondiral otooji

Tanaa bonɗo waɗii fuɗnaange Wuro Wad Naaga : Naatondiral bonngal hakkunde biis e oto tokooso – yimɓe njoyo e nder galle gooto maayii, tuugnaade e cewle men ɓadiiɗe. E nder aksidaa bonɗo, kulɓiniiɗo baɗɗo hannde subaka sara wuro Bir El Baraka, fuɗnaange Wad Naaga, ko bus jolnunooɗo gooski faade wuro Selibaabi e oto tokooso jolnunooɗo yimɓe njeegomo pelɓondiri. Aksidaa oo addani otooji ɗii kala ruppitaade jeyngol haa yimɓe njoyo cumi heen haa ndooyti, tawii kamɓe fof ko e galle gooto ɓe njeyaa. Neɗɗo jeegoɓiijo oo, gaañiima no feewi. So tawii noon ko jolnooɓe e biis ɓee keɓii gaañanɗe keewɗe, tawi hay maayɗo gooto waɗaani e nder oon oto.

Wiɗtooji gadani ɗii kollitii wonde ina gasa tawa cumu nguu fotata saabaade ɗum ko butel gaas gonnooɗo e nder oto tokooso oo, ko ɗum addani ɗum ɓeydaade saɗtinde musiiba oo. Ooɗoo aksidaa ina jeyaa e ɓurɗo waɗde maayɓe e jonte ɓennuɗe ɗee e laawol « Route de l’Espoir », hono laawol yaakare gonngol hakkunde Nuwaasot e Butelmiit. Ɓesngu leydi ndii e sarɗiyankooɓe ceeraani hesɗitinde noddaali ngam ɓeydude kisal laabi e ɓeydude ƴeewndo karallaagal otooji e ngol laawol jooɓingol pittaali keewɗi.